ЧЕТВРТА БАЛКАНСКА ШКОЛА НА ПЕДИЈАТРИТЕ
СКОПЈЕ, 26–28 МАРТ 2026
Во период од 26.03-28.03.2026, во Скопје, во просториите на хотел Хилтон, се одржа Четвртата балканска школа на педијатрите — настан кој со право може да се нарече едно од највредните и најинспиративните собири на педијатријата во регионот. Организатор на овој настан е Здружението на педијатрите на Македонија, предводено од неговата претседателка, проф. д-р Аспазија Софијанова со идејата дека знаењето нема граници, дека педијатријата е повик а не само професија, и дека грижата за детето е највисока форма на хуманизам.
Три дена, девет сесии, бројни предавачи од земјата и странство — тоа беше рамката. Но зад бројките стоеше нешто поголемо: вистинска заедница на лекари обединети од заедничка страст — здравото, среќно и заштитено дете.
Школата започна во четврток, 26 март, со регистрација и свечено отворање на кое присуствуваа највисоки државни претставници, претседателот на IPA проф. д-р Џозеф Хадад, поздравен говор од претседателот на EPA проф д-р Бертхол Колетцко како и многу други пријатели и поддржувачи на Здружението на педијатрите на Македонија и Балканската школа. Самиот факт дека настанот доби вакво институционално признавање зборува повеќе од кои било зборови за значењето кое денес и се придава на педијатријата во нашата земја.
Научната програма беше богата, разновидна и внимателно составена. Првиот ден беше посветен на педијатриската реуматологија, под модерација на проф. д-р Мехмет Јилдиз, со предавачи од реномираната болница Черах Паша во Истанбул, кои ги покрија темите од физикалниот преглед, преку значењето на осипот и лабораториските маркери, сè до сврзно-ткивните заболувања и периодичните трески кај деца. Истиот ден, во следната сесија, се дискутираше и за менталното здравје и физичката активност кај децата — со акцент на развојната невробиологија и психопатологијата, когнитивниот и социо-емоционалниот развој, па сè до влијанието на физичката активност врз здравјето на децата.
Вториот ден, петокот, донесе уште поширок спектар на знаења. Сесијата за педијатриска кардиологија и кардиохирургија, под модерација на д-р Тања Анѓушева и д-р Иван Милев, опфати теми од срцевите тумори, биомаркерите во кардиоваскуларните болести, интра- и екстракардијалните шантови, сè до триадата на конгениталните аномалии и нивниот клинички менаџмент. Следуваше потоа сесијата за педијатриска ендокринологија, модерирана од проф. д-р Марина Крстевска и проф д-р Александра Јанчевска, ги разгледа современите пристапи во лекувањето на ахондроплазијата, напредните технологии во третманот на дијабетес тип 1 и значењето на мајчиното млеко за растот и развојот на детето — тема која никогаш не застарува.
Попладнето на петокот беше резервирано за две исклучително актуелни сесии. Сесијата за вештачката интелигенција во медицината и педијатријата, модерирана од проф д-р Владимир Чадиковски и д-р Моника Симјановска Мишева, ги постави суштинските прашања на нашето време: каква е улогата на вештачката интелигенција кај белиот мантил? Каде завршува технологијата и каде почнува лекарот? Предавачите од Скопје и Нови Сад дадоа конкретни одговори, но и отворија нови размислувања. Сесијата за педијатриска неврологија, пак, под модерација на проф. д-р Аспазија Софијанова и д-р Димитрие Николиќ, ги опфати принципите на лекување на епилепсијата, невропротекцијата кај предвремено родените бебиња, примената на дексмедетомидин во педијатриската интензивна нега, како и предизвиците во лекувањето на SMA — болест која сè уште го тестира медицинскиот систем ширум светот.
Третиот ден од школата започна со сесија за педијатриска нефрологија, модерирана од проф. д-р Велибор Тасиќ и д-р Нора Абази Емини, на која предавачи од Лондон, Загреб и Израел ги споделија своите искуства во дијагностиката и третманот на инфекциите на уринарниот тракт, везикоуретералниот рефлукс, уролитијазата и нефротскиот синдром — состојби кои честопати поминуваат незабележани сè додека не станат сериозен клинички проблем.
Сесијата за алергологија, пулмологија и имунологија, модерирана од проф. д-р Булент Карадаг и д-р Татјана Баевска Вучковиќ, донесе нови сознанија за дијагностиката и третманот на астмата кај деца, молекуларната дијагностика на пневмониите, како и за улогата на ултразвукот во дијагностика на белодробните заболувања кај децата.
Но веројатно најтопол аплауз го доби сесијата која по форма и содржина се разликуваше од сите останати — интерактивната работилница за родители на тема „Првите 1000 дена во развојот на детето”, модерирана од Билјана Дебарлиева. Затоа што педијатрот не е само лекар на детето — тој е партнер на целото семејство, мајки и татковци, заедно со педијатрите, разговараа за исхраната, суплементите, дојењето, коликите, комуникацискиот развој и штетноста на екраните — теми кои ги засегаат сите семејства и често предизвикуваат бројни дилеми и прашања кај родителите.
Едно мало, тивко дело — со голема порака. Меѓу сите содржини на Школата, едно мало но длабоко дело привлече посебно внимание. За време на настанот беа изложени и понудени за продажба слики на Хана Салиоска — единаесетгодишно девојче кое во моментот се лекува на одделот за хематологија и онкологија. Нејзините слики, создадени во моменти кога многу деца само би очекувале утеха, беа сведоштво за неисцрпната сила на детскиот дух.
Четвртата балканска школа за педијатри не беше само собир за педијатрите. Беше средба на умови и срца. Беше потврда дека македонската педијатрија живее, расте, учи и зрачи далеку надвор од своите граници. И беше порака дека, без разлика на разликите во јазик, земја или специјалност, сите присутни го делат истото: дека секое дете заслужува најдобро.
До Петтата Балканска Школа на педиајтрите — со нетрпение.
4-тиот Интернационален симпозиум за новини во педијатријата
Драги колеги,
4-тиот Интернационален симпозиум за новини во педијатријата, во заедничка организација на Здружението за педијатриска алергологија, имунологија и астма и Здружението на педијатри на Македонија, ќе се одржи од 12 до 15 мај 2026 година во FH55 Grand Hotel Mediterraneo во Фиренца
Се очекува присуство на вкупно 120 здравствени професионалци, од кои 45 од Турција, 30 од Македонија, 20 од Унгарија, 10 од Црна Гора и 15 од Чешка Република.
Нашата цел е да организираме квалитетен и продуктивен конгрес кој ќе овозможи научна размена, споделување на професионални искуства и пренос на знаење во областа на педијатрискиот развој.
Со особена чест Ве покануваме да бидете дел од овој значаен меѓународен настан и да придонесете кон неговиот научен успех.
The 4th International Pediatric Updates Symposium
Dear colleagues,
The 4th International Pediatric Updates Symposium, jointly organized by the Society of Pediatric Allergy, Immunology and Asthma and the Macedonia Pediatric Association, will take place from May 12 to May 15, 2026, at FH55 Grand Hotel Mediterraneo in Florence.
A total of 120 healthcare professionals are expected to attend, including 45 from Turkey, 30 from Macedonia, 20 from Hungary, 10 from Montenegro, and 15 from the Czech Republic.
We are committed to organizing a productive and high-quality conference that will bring together colleagues from different countries for scientific exchange, sharing of professional experiences, and transfer of expertise in the field of pediatric development.
We cordially invite you to join us at this important international event and contribute to its scientific success.
4та Балканска Школа на педијатрите 2026 година
Почитувани колеги и соработници,
Со големо задоволство Ви ја најавуваме 4та Балканска Школа на педијатрите организирана од Здружението на педијатри на Македонија, која ќе се одржи во период од 26.03.2026 до 29.03.2026 година во хотел Хилтон, Скопје.
Повеќе информации за регистрација, котизации и научна програма следуваат во наредниот период.
Трета балканска школа-2022
После две успешно реализирани школи, во периодот од 26 до 28 октомври 2022 година, во хотелот „Хилтон“ во Скопје, се одржа трета балканска школа на Здружението на педијатри на Македонија. Европската Педијатриска Асоцијација (EPA) во 2015 година ја избра Македонија, преку Македонското здружение на педијатри, да биде домаќин на Балканската школа за педијатрија, која се организира во интервал од две години.
После две успешно реализирани школи, во периодот од 26 до 28 октомври 2022 година, во хотелот „Хилтон“ во Скопје, се одржа трета балканска школа на Здружението на педијатри на Македонија. Европската Педијатриска Асоцијација (EPA) во 2015 година ја избра Македонија, преку Македонското здружение на педијатри, да биде домаќин на Балканската школа за педијатрија, која се организира во интервал од две години.
На настанот присуствуваа околу 300 медицински професионалци. Темите на школата беа фокусирани на: ретки болести, неонатологија, аутизам, неврологија, имунизација и пулмологија со алергологија. Големиот интерес од страна на медицинските работници од земјата и регионот ја потврдија нашата способност да бидеме добри домаќини. Школата претставуваше одлична можност за размена на искуства, нови знаења и усвојување на регионални алгоритми, како и за социјална комуникација
Тридневниот настан вклучуваше по две работни сесии дневно, како и комерцијални предавања од страна на спонзорите. Компании од фармацевтската индустрија, кои ја препознаа важноста на настанот, активно учествуваа.
Настанот, освен што ги зближи медицинските професионалци од регионот, создаде основа за идни иновации, подобрување на стручните практики и зајакнување на соработката во полето на педијатријата.
Првата Балканска школа за педијатрија-2018
Со свечена гала вечер во хотелот „Александар Палас“ во Скопје, на 12 септември започна првата Балканска школа за педијатрија, организирана од Здружението на педијатри на Македонија. Настанот траеше три дена, завршувајќи на 15 септември, и собра над седумдесет истакнати професори и лекари од Македонија и повеќе балкански и европски земји, меѓу кои Австрија, Албанија, Бугарија, Србија, Хрватска, Словенија, Црна Гора и Турција.
Во своето поздравно обраќање, претседателката на Здружението на педијатри, доц. д-р Аспазија Софијанова, истакна дека школата е насочена кон подигнување на квалитетот на медицинската нега и третманот на најмладите пациенти, со акцент на теми како грижата за предвреме родените бебиња, важноста на вакцинирањето, трансплантацијата, како и подобрувањето на дијагностиката и третманот на ретките болести.
На свеченото отворање, министерот за здравство Венко Филипче, претседателката на Лекарската комора д-р Калина Гривчева Старделова, директорот на Фондот за здравствено осигурување Ден Дончев и премиерот на Македонија, Зоран Заев, заедно со својата сопруга Зорица Заева, ја потенцираа важноста на поддршката за педијатриската нега и унапредување на здравствените услуги за најмладите пациенти.
Еден од клучните моменти на настанот беше обраќањето на светски познатиот професор и хирург од Медицинскиот универзитет во Виена, Проф. д-р Валтер Клепетко, кој ја нагласи важноста на трансплантацијата и заедничката работа меѓу земјите од регионот. Како посебно изненадување на гала вечерта, присуствуваше и Ангела Блажевска, пациентка од Македонија на која проф. Клепетко ѝ изврши успешна трансплантација на бели дробови во Виена пред две години.
Школата, освен работните сесии, вклучуваше и саем со учество на фармацевтски компании, како и предавања наменети за медицински сестри и физиотерапевти. Македонски и странски експерти презентираа новини во различни области на педијатријата, вклучувајќи имунизација, кардиологија, пулмологија, неврологија, гастроентерологија, хематоонкологија и интензивна нега.
Настанот послужи како платформа за размена на знаења, идеи и искуства, со цел унапредување на практиките и креирање на унифицирани стандарди за третман на најмладите пациенти. Првата Балканска школа за педијатрија успешно го отвори патот за понатамошна регионална соработка и подигнување на квалитетот на здравствените услуги во полето на педијатријата.
