8ми Конгрес-2023
Во периодот од 1 до 4 јуни 2023 година, во хотелот „Александар Палас“ во Скопје, Република Северна Македонија, се одржа Осмиот конгрес на Здружението на педијатри на Македонија со интернационално учество. Конгресот привлече повеќе од 400 доктори, вклучувајќи над 100 учесници од Европа, кои во текот на настанот одржаа предавања, споделија професионални искуства и понудија нови насоки во областа на педијатријата. Меѓу учесниците се вброија доктори од Атина, Загреб, Анкара, Љубљана, Софија, Белград, Тирана, Букурешт, Сараево, Приштина и други градови.
Настанот официјално беше отворен од Претседателката на Здружението на педијатри на Македонија, проф. д-р Аспазија Софијанова. Пред присутните се обратија и: Претседателот на Европската педијатриска академија, проф. д-р Адамос Панјотис; заменик-министерката за здравство, д-р Маја Манолева, во име на министерот за здравство, прим. д-р Беса Поцеста; советничката за здравство на премиерот, проф. д-р Ана Данева Маркова; претседателката на Лекарската комора на Република Македонија, проф. д-р Калина Старделова; претставникот на Македонското лекарско друштво, д-р Сеад Зејнел; претседателот на Српското педијатриско здружение, проф. д-р Ѓорѓе Константинидис; и претседателот на Косовското педијатриско здружение, проф. д-р Рамуш Бејчи.
Првпат во рамките на конгресот, Здружението на педијатри на Македонија ги обедини и Десеттиот курс на Југоисточноевропската педијатриска работна група, како и PEDECC курсот за педијатриска интензивна нега. Една од главните активности беше практичната работилница, организирана под водство на проф. д-р Есра Шефкетоглу и поддржана од Европската педијатриска академија (EAP). На оваа работилница, младите доктори добија можност за обука и сертификат признат за работа во единици за педијатриска интензивна нега во Европа.
Конгресот опфати повеќе области од педијатријата, како што се кардиологија и ревматологија, нефрологија, неврологија со невролошки развојни нарушувања, имунологија, неонатологија со неонатална интензивна нега и грижа. Исто така, се одржаа сесии на експертски интердисциплинарни тимови и дискусии за ефектите од пандемијата на Ковид-19 врз детската популација.
Силната порака „Детето припаѓа на педијатарот, а педијатрите се грижат за децата кои се иднината“ го нагласи значењето на мисијата на докторите – да обезбедат здрав раст и развој на најмладите.
7ми Конгрес-2019
Повеќе од двеста учесници, меѓу кои педесет истакнати професори и лекари од Македонија, како и од Турција, Албанија, Бугарија, Србија, Хрватска, Словенија, Косово и Црна Гора, учествуваа на 7ми Конгрес на педијатрите со меѓународно учество. Настанот, организиран од Здружението на педијатрите на Македонија, се одржа од 25 до 28 јуни 2019 година во хотелот “Сириус” во Струмица.
Конгресот имаше за цел да поттикне размена на знаења и искуства меѓу стручниот кадар од Македонија и Европа во областа на педијатријата, со фокус на подобрување на секојдневните практики, третмани и протоколи. Програмата опфати стандардни теми од различни области на педијатријата и превентивната медицина, како и специјализирани теми, вклучувајќи пулмологија со алергологија, превентивна педијатрија, неврологија со развојна педијатрија, ретки болести, хематологија со педијатриска онкологија и неонатологија. Покрај стручните предавања, беше организиран и саем на кој излагачи беа 19 компании тесно поврзани со педијатријата.
На свеченото отворање, кое се одржа на 25 јуни, свое обраќање имаа претседателката на Здружението на педијатрите, проф. д-р Аспазија Софијанова, министерот за здравство, Венко Филипче, како и бројни претставници од педијатриски здруженија од регионот и Европа. Меѓу нив беа проф. д-р Емеритус Енвер Хасаноглу, претседател на Интернационалната педијатриска асоцијација (IPA), проф. д-р Рамуш Бејќи, претседател на Педијатриското здружение на Косово, проф. д-р Влада Вукомановиќ, директор на институтот “Мајка и дете” во Белград, и други истакнати гости од Бугарија, Хрватска, Словенија и Северна Македонија. Видео обраќање имаше и проф. д-р Небојша Кавариќ, претседател на Асоцијацијата за превентивна педијатрија на Црна Гора.
Проф. д-р Аспазија Софијанова, во своето инспиративно излагање, ја истакна важноста на професијата педијатар, нагласувајќи дека се работи за професија која бара посветеност, емпатија и огромна одговорност. Таа додаде: „Да се грижиш за новороденче, дете или адолесцент е задача што педијатарот ја прифаќa доброволно, чувствувајќи ја тежината на одговорноста и емотивниот товар кој го носат и пациентите и нивните семејства. Со голем ентузијазам ги прифаќaм сите конгреси, едукации и состаноци на кои можеме да го размениме своето знаење и искуства“.
